Anmelden
Dr Ort, vo dr historische Schlacht

Je weniger historischi Belege, desto rycher wärde d Sage, wo sech um nes gschichtlechs Ereignis ranke. Das isch o bim Ursprung vom Name vo dr Aup «Schlacht» im Sörebärg eso. Für aui, wo öppe im Winter dert häre gö ga Schii fahre: Die Aup ligt zimli ir Mitti vom Schiilift, wo me id Schwand ueche chunnt u dr Rothorn-Gondubahn. 

Itz aber zrügg zum Ortsname «Schlacht»: Vo de Historiker bestätiget isch, dass es 1380 zure chriegerische Usenandersetzig isch cho zwüsche Äntlibuecher u Obwaudner. Schriftlechi Belege gits aber kener. Es isch nid aznäh, das zwöi grossi Heer ufenang los sy, sondern ender es Grüppli Obwaudner, wo es paar Äntlibuecher Äupler überfaue hei. 

I spetere Schlachte hei d Äntlibuecher u d Obwaudner süsch geng zäme gha. 1380 sy si aber Finde gsy; si hei o nid zum glyche Lager ghört. D Obwaudner sy unabhängig gsy; d Äntlibuecher hingäge hei zu Habsburg ghört. Überliferet isch, das me sech 1381 imene guet schwyzerische Verglich geiniget het. 

Itz aber zur Sag: Für das die Jahrhunderti überläbt, muess e schlimmi Tat passiert sy: D Obwaudner sy uf die Aup ygfaue u hei dr Äupler ids Chäs-Chessi ta, wo vou Schotte isch gsy, so dass dä eländiglech ersoffe isch. 

Nächhär brucht e rächti Sag e Heud: Dr Wintrüb. Dä het d Obwaudner fasch im Alleigang gschlage. U dä isch nid nume e Grobian gsy, sondern o e clevere Maa. Är het nämlech am Veh, wo d Obwaudner gstohle u uf ihri Syte gjagt hei, d Treichle abzoge, für se ohni Lärm wieder uf Äntlibuecher Bode chönne z bringe. Dr Wintrüeb syg no im Stau blibe u heig e chly treichelet, so dass d Obwaudner, wo ire Sieg mit viu Brönntem heige gfyret, gmeint hei, die Chüe syge no dert. Ersch, wo dr Wintrüeb sicher isch gsy, dass dä Coup glunge isch, isch o är zrügg ids Äntlibuech gsprunge. D Obwaudner heigene no verfougt, ihn aber nid verwütscht.

De hei die Röiber wöue Rach näh. E erschte Aschlag het dr Heud vom Äntlibuech aber chönne abwehre. Bim zwöite Versuech syge d Obwaudner de perfid vorgange: E Maa het am Wäg uf Schüpfheim e Verletzte gspiut u dr Wintrüeb het ihm wöue häufe. Wo är sech über das vermeintleche Opfer heig böigt, heig dä Obwaudner am Wintrüeb sy Douch gno u ihm dä z mitts ids Härz gstosse. 

 

Queue: «Ortsnamenbuch des Kantons Bern», «Orts- und Flurnamen des Amtes Entlebuch», www.idiotikon.ch u wyteri. Aafrage: 034 409 40 05 oder zuercher@wochen-zeitung.ch



13.07.2017 :: Bruno Zürcher
Wochen-Zeitung
Brennerstrasse 7
3550 Langnau i. E.
Tel. 034 409 40 01
Fax 034 409 40 09
info@wochen-zeitung.ch
Redaktion: 034 409 40 05
Öffnungszeiten:
Montag - Freitag
07:30 - 12:00 Uhr
13:30 - 17:00 Uhr