Anmelden
Wie d Bärner Platte isch erfunge worde

Ei grossi bärneschi Erfindig ir Chuchi geit nid uf die herrschaftlechi Chuchi vo de gnädige Herre zrügg, nämlich d Bärner Platte. Es isch aaznää, dass das Gricht imene «Frässbedli» im Ämmitau isch bekannt worde. Bärner Platte isch aber o 1798 im Gaschthus zum Chrüz z Wohle kochet worde, wo me die tapfere Bärner Soudate churzfrischtig het müesse verpflege. Me heig aus zämegsuecht, wo me i de Burehüser drumum heig gfunge. Drum die grossi Uswau vo Fleisch u Gmües. Ds erschte druckte Rezäpt vonere Bärner Platte fingt me aber ersch um 1850.

Im Bärner Chochbuech vo 1749 finge mir e Schwyzer Chöschtlechkeit zum erschte Mau: D Serwela! D Nationauwurscht isch öppe um die Zyt o erfunde worde. Das isch o so, wüu denn die erschte Fleischwöuf sy ufcho. Die Serwela het me denn aber säuber müesse mache. Hie ds Rezäpt vo 1749: «Nimme gebutzte Rinderdärm, mit nachfolgendem gefüllt, und zu Würsten gemacht: nimm Speck und Schweinefleisch, oder wann du willst Schaf- oder anders Fleisch, hacke es wohl, nimm Salz, Pfefferpulver, weissen Wein, Nägelipulver, Majoran, Lauch oder Zwibelen, nimme dann auch ein wenig frisches schweinigs Blut, knette alles wohl untereinander, thue es in die Därme Wursts-Weise, hernach räuche sie im Camin etwelche Tage, koche sie im Wasser, thu zuletzt ein wenig Wein daran: Sie behalten sich ein Monat lang gut, wann sie schon gekocht sind.» 

Die Serwela het me no mit em Fleischwouf gmacht. Ersch vo 1900 a sy de die hütige «Cutter» gmacht worde, zum Byspiu o mit Maschine vor Langnouer Firma Liechti. 

I weiss afe, wenn me weli Läbensmittu ygfüehrt het. Auso Härdöpfu – u drmitt o d Röschti – sy gemäss de Chochbüecher im Ämmitau nid vor em Jahr 1770 bekannt worde. I dene Jahr isch e Hungersnot gsy u me het gässe, was gwachse isch, u d Härdöpfu sy cho, o we ds Wätter grusig isch gsy u ds Chorn nid het wöue grate. Teigware sy hieume nid vor de 1920er-Jahr ufchoo. Vorhär het me zwar das z Italie scho kennt, aber die wäre vieu z tüür gsy. 

26.04.2018 :: Hans Minder, Lokalhistoriker
Meistgelesene Artikel
Der geneigte Leser meiner Kolumnen weiss es ja sicher schon lange: ich mag die Sprache, ich mag das...
«Manchmal trainieren die Piccolos dasselbe wie Ciaccio und Punnenovs»
SCL Tigers: Er ist einer, der im Hintergrund viel bewirkt, ohne dass die grosse Masse davon Notiz nimmt: Dusan...
«Eines aber wissen wir: Alles trägt zum Besten derer bei, die Gott lieben; sie sind ja...
D Hirsche hei Spure hingerlaa
Woni letscht Wuche über Hirsche ha recherchiert, hani uf dr Wandercharte gluegt, wo düre...
Salon hat neue Besitzerin
Zäziwil: Monika Keller hat den Coiffeur-Salon von Silvia Steiner an der Bernstrasse 8 übernommen: Er...
Wochen-Zeitung
Brennerstrasse 7
3550 Langnau i. E.
Tel. 034 409 40 01
Fax 034 409 40 09
info@wochen-zeitung.ch
Redaktion: 034 409 40 05
Öffnungszeiten:
Montag - Freitag
07:30 - 12:00 Uhr
13:30 - 17:00 Uhr