Anmelden
Was ir Sagi aube ufe Tisch isch cho
Vo früecher:

I ha scho imene früechere Bytrag erwähnt, dass ds Mischtebüeu-Heimet im Heimisbach kener Stüüre het müesse zahle, mit Usnahm: Dr Höizähnt füre Pfarrer. Konkret sy das 6 Chrüzer gsy, oder öppe 10 Franke hütiger Währig. Mischtebüeu isch ds gröschte Heimet gsy ir ganze Trachsuwaud-Gmein mit über 200 Jucherte Land, Waud u Weide. Ghört het dä Hof dr Familie Ruch. Wo die kener Sühn me hei gha, hets dr Letscht amene Schär vo Eriswiu verchouft. Im Abträttigsvertrag vo 1796 isch bi de Zuegabe no erwähnt, dass dr Suhn näb dr Bibu, em Chuchitisch u angere Yrichtige o d Läbesmittu im Vorrat übernähm. Dert steit, dass dennzumale es ganzes Söili im Chuchirouch ghanget sig. O d Heufti vo de «amerikaner Härdöpfu» söu är übernäh. 

Itz chöme mer zur Houzsagi vo Trachsuwaud. Die isch am 23. Horner 1664 yrgrichtet worde, denn hei nämlech die Gnädige Herre vo Bärn em Niklaus Aeschlimann vom vordere Houz die Konzession drfür gää. Gfeuers hei die Sagi 1887 kouft. Ir Latärne het üs no e Frou verzeut, wo dert isch ufgwachse. Si syge dehei zwöuf Ching gsy u heige öppe aues säuber aapflanzt. Vier Chüe heig dr Vater gha u öppe gäng o e Geiss. Im Novämber u im Februar heig me es Söi li gmetzget, das es de ömu o gäng gnue Söischmutz heig. Es heig jede Tag Röschti gää, im Früelig heig me sech de aube uf die erschte Rhabarbere gfröit. Am Geburtstag heig jedes Ching es Spieguei uf sy Röschti übercho. I dr Hoschtet heigs Öpfuböim, Bireböim u Chirschböim gha. Stangebohne, Chifu u Zuckerärbs heig d Mueter im Pflanzblätz aapflanzet. Chabis heig me o gmacht, das heig de Surchabis gää. Rüebli, Louch u Rätech heg me o aapflanzt, genau so wie Sellerie. Chabisrüebe u Runggle sige de aber für ds Veh gsy. Das heig me nid gässe. 

Im Mittubach isch 1920 dr Fritz Kramer dr Bsitzer gsy. Är isch e vieusitig begabte Maa gsy, het är doch nid nume aus Beck u Konditer gschafft, nei är isch o Zahnarzt u homöopatische Dokter gsy. Är het sogar vo sine Patiänte Ordinationsbüecher gfüehrt. 

Vom chlyne Höfli «Chlepfer» isch nüt me da weder e Summerstau, aber der Simon Gfeuer het ds «Chlepfer-Änni» i sire Gschicht verewiget. 

D Sparrenegg isch scho im Jahr 1339 zersch Mau i de Akte erwähnt. Aber no 1480 isch es nid es Heimet, aber e Aup gsy. Dä Hof het syt aute Zyte Aeschlimaas ghört. 1784 isch är ufteilt worde. Dr Hof wird hüt i dr sächste Generation vo Gehrigs bewirtschaftet. Ds Trudi Habegger, wo uf em Sparrenegghof isch ufgwachse, het is verzeugt, dass sie scho 1928 heige z Telefon iigrichtet. De heige si de aube aus Ching müesse de Nachbere ga usrichte, was die Lüt vo de Nachbere heige wöue.



05.01.2018 :: Hans Minder, Lokalhistoriker
Meistgelesene Artikel
Der grosse Sieger am Seeländischen heisst Matthias Aeschbacher
Schwingen: Für Matthias Aeschbacher ist es der fünfte Kranzfestsieg. Der 26-jährige Emmentaler...
Die jüngste der Schwestern tanzt aus der Reihe und springt über Hürden
Leichtathletik:   Die 13-jährige Yogani Yogalingam aus Langnau führt derzeit die Schweizer...
Die GLB ist stetig gewachsen und hat auch Krisenzeiten überwunden
Emmental:   Die GLB kann dieses Jahr ihr fünfzigjähriges Bestehen feiern. Die Hilfe zur...
Kolumne: Im Radio läuft irgend so ein Song mit Banjo. «Steig in den Wagen, Baby, wir fahren weg,...
«Das grosse Ganze haben wir im Griff, jetzt kommts noch auf die Details an»
Turnen:   In gut einer Woche wird Langnau den Turnern und den Turnerinnen gehören. Das...
Wochen-Zeitung
Brennerstrasse 7
3550 Langnau i. E.
Tel. 034 409 40 01
Fax 034 409 40 09
info@wochen-zeitung.ch
Redaktion: 034 409 40 05
Öffnungszeiten:
Montag - Freitag
07:30 - 12:00 Uhr
13:30 - 17:00 Uhr