Anmelden
Wär isch dr heilig Oswaud gsy?

Dr Heilig Oswaud isch nid grad e Heilige, wo me im erschte Momänt a ds Ämmitau däicht. Är isch nämlech e änglische Chünig gsy. Uf d Wäut cho isch är im Jahr 604 u am 5. Ougschte 642 bi Maserfield im Kampf gänge die unglöibige Wikinger umcho. Im Jahr 634 isch är Chünig vo Northumbria worde. 

Itz luege mer zersch no chly zrügg: D Römer hei ja Britannie eroberet gha. Si hei das Land de aber müesse ufgää. Vo Norddütschland här sy de zwe germanischi Stämm – d Angle u d Sachse – uf Britannie übere. Im Süde u ir Mitti vom hüttige Ängland sy verschiedeni Chünigrych entstange. Es isch kes einheitlechs Rych gsy. Dür d Römer, wo no dert sy gsy, u dür Mönche us Irland het sech de o ds Chrischtetum o bi de Angle u de Sachse verbreitet. Vom Norde här sy de aber d Wikinger uf Britannie cho; wüeschti Chrieger u Plünderer. Vom Chrischtetum hei si nüt wöue wüsse – we si aus Chriegsheude sy gfaue, de hei si zum Gott Odin uf Wallhalla dörfe. Dert hei si bis zum Wäutungergang am Tisch vom Odin chönne frässe, suufe u chriege, so viu si hei wöue. 

Dr Oswauld vo Northumbria isch so ne Suhn gsy vomene lokale, anglische Chünig. Dr Oswaud isch während sire Jugend z Schottland gsy u dert im Chloschter Iona o chrischtlech touft worde. Dr Oswaud het de nach em Tod vo sim Vater das Land zrüggeroberet. Är isch dr einzig vo sine Brüeder u Verwandte gsy, wo Chrischt isch gsy,   u si Siig isch aus Gottesurteil aagluegt worde. Är het de mit de angere Chünige vo Britannie e Zämeschluss gsuecht. Är het das bekannte Chloschter Lindisfarne la boue u isch scho drum zu Läbzyte fasch e Heilige worde. Eine vo de angere Chünige, dr Penda vo Mercia, isch schlussändlech der besser Chrieger gsy u het dr Oswaud im Jahr 642 uf em Schlachtfäud vo Maserfield gschlage. Dr Oswaud isch verschtückled worde. Si Brueder het die Lycheteili zämesammelt u z Lindey beärdiget. Wüu dr Oswaud ds letsche heidnische Chünigrych verlore het, isch är vor Chiuche aus Märthürer aagluegt worde.

23.11.2017 :: Hans Minder, Lokalhistoriker
Meistgelesene Artikel
Kolumne: Meine Freude war gross, als ich den Brief eines grossen Discounters erhielt, in dem ein Gutschein...
Singen im Songline-Musical und  Kindern etwas weitergeben
Rüegsau: Bei einer Probe des diesjährigen Songline-Musicals sangen 126 Kinder und Jugendliche vom Leben...
Ei grossi bärneschi Erfindig ir Chuchi geit nid uf die herrschaftlechi Chuchi vo de...
Junge Gärtnerin gibt in SRF-Sendung «Hinter den Hecken» Tipps
Lauperswil: Als Expertin in der Sendung «Hinter den Hecken» gibt Céline Gurtner Tipps zu...
Dä Ortsname kenne nume no weni Lüt
Bimene Haar wäri dä Ortsname, wos hüt drum geit, äue für geng verlore...
Wochen-Zeitung
Brennerstrasse 7
3550 Langnau i. E.
Tel. 034 409 40 01
Fax 034 409 40 09
info@wochen-zeitung.ch
Redaktion: 034 409 40 05
Öffnungszeiten:
Montag - Freitag
07:30 - 12:00 Uhr
13:30 - 17:00 Uhr