Anmelden
Si hei bim chrumme Houz badet

Woni z ersch Mau im Saau im oberschte Stock vor Wirtschaft Chrummhouzbad im Heimisbach bi ghocket, hani are lengere Gmeinsversammlig viu Zyt gha, für d Bauke vo dr Tili z studiere. Drzue hani ghoffet, dass die Bauke, wo die Lüt vor Versammlig aui sy druffe ghocket, nid so chrumm sy, wie die obedranne. Item. Es isch aues guet gange u siderhär bini scho mängisch i däm gmüetleche Saau obe ghocket u das nid nume für Gmeinsversammlige. 

D Bezeichnig Chrummhouzbad isch uf au Fäu nid wäg de chrumme Höuzer ar Tili vom Saau entstange – ganz abgseh drvo, dass die äue o einisch grad sy gsy. Wohär, aber chunnt de die Bezeichnig? Fö mir Mau mitem mittlere Teu «Houz» a. Das Wort meint nämlech nid «Houz» im hüttige Sinn, sondern ender e ganze Waud – äbe dert, wo ds Houz här chunnt. 

U itz gömer uf «chrumm» los. Afe einisch hani gluegt, öb äch das Wort würklech «nid grad» meint oder doch öppe e «Chrumme» – de würd dä Ortsname eifach «e höuzige Chrumme» bedüte. Unger angerem i de Amtsrächnige usem Jahr 1791 steit aber «Krumholz»: auso isch doch öppis chrumm – äbe, ds Houz, dr Waud. Da gits für mi zwo Müglechkeite, wie das gmeint chönnti sy. Afe einisch isch es eso, dass dr Waud obem Chrummhouzbad stotzig isch u dert d Tanne sicher chrumm wie Auphörner wachse. Die zwöiti Müglechkeit isch, dass die Bezeichnig entstange isch, wüu dä Waud zigzag – auso chrumm – a däm Hoger nah verlouft. 

De hätte mer zwe Drittu vo däm Ortsnäme. Es fäut nume no ds Bad; u die Sach isch schnäu klärt. I dere Wirtschaft isch – wie i viune angere o – badet worde. Ds Chrummhouzbad isch aber nid e Badaastaut mitere sehr länge Gschicht; es isch bis i ds 19. Jahrhundert yche es «normaus» Bureheimet gsy. Ersch 1823 isch d Wasserqueue ungersuecht worde. Im Jahr 1834 isch de d Badstube ygrichtet worde. Ds hüttige Wirtshuus isch übrigens im Jahr 1878, nachdäm dass es achebrönnt isch, bout worde – scho vo däm här isch klar, dass dä Name nid vo de chrumme Bauke ar Tili vom Saau cha cho. Dr Saau isch nämlech viu jünger aus dr Ortsname.  

25.01.2018 :: Bruno Zürcher
Meistgelesene Artikel
Kolumne: «Komm schnell her», rief ich im Discounter begeistert meiner Freundin zu. Mit wehendem...
Chancenlos gegen «Friedrich ufs Ysch»
Cup: Die SCL Tigers bestreiten am Mittwoch nächster Woche in Rapperswil den zweiten Cuphalbfinal...
Auszeit: In der zweiten Adventswoche ist uns ein Vers aus dem Lukasevangelium ans Herz gelegt (21,28):...
Tigers mit positiver Halbzeitbilanz
SCL Tigers:   25 von 50 Quali- Runden sind gespielt und Langnau steht so gut da, wie noch nie. Das hat...
D Chochschueu het Apetit gmacht uf meh
Vo Früecher: Chochbüecher gits gäng wie meh. I de Buechhandlige gits äxtra e Egge, wo me die...
Wochen-Zeitung
Brennerstrasse 7
3550 Langnau i. E.
Tel. 034 409 40 01
Fax 034 409 40 09
info@wochen-zeitung.ch
Redaktion: 034 409 40 05
Öffnungszeiten:
Montag - Freitag
07:30 - 12:00 Uhr
13:30 - 17:00 Uhr