Anmelden
«Schön» het aube meh «gäbig» gmeint
«Schön» het aube meh «gäbig» gmeint Ört u Näme:

Schön isch es, amene schöne Ort z wohne. Im Ämmitau u Äntlibuech fingt me e ganzi Zilete vo Ortsnäme mit «Schön» drinne – «Klar», wärdet Dir säge, «hie isch es ja o schön!» 

Das isch sicher eso. Aber vor es paar Jahrhunderte, wo viu vo dene Bezeichnige sy entstange, isch «schön» no chly angersch gmeint gsy. «Schön» het sech denn vor auem uf d Bewirtschaftig bezoge u das meischtens im Verglich zumene Ort, wo ds Bure weniger gäbig isch gange. Vo däm här verwungerets nid, dass me vor auem i stotzigere Gägende viu «Schön»-Ortsnäme fingt. Dert sy die bessere Bitze – wo me nid het müesse Angscht ha, das aues achetrolet – bsungers gschetzt worde. Ds Gebiet «Schonegg» passt hie guet drzue. Rundum isch es rächt stotzig, uf der Egg isch ds Bure aber scho im 14. Jahrhundert gäbig gange. Uf au Fäu isch das Gebiet imene Dokumänt von 1389 mit dr äxakt glyche Bezeichnig erwähnt worde. Dass dä Ortsname miteme «o» nid miteme «ö» isch gschribe worde, isch nid un­gwöhnlech. Es git o Byspiu, wo mehrfach isch gwächslet worde. Es Heimet z Oberdiessbach – e chly unger der Marguhole – het i de Amtsrächnige vo 1565 «Schönegk» gheisse, i spetere Dokumänt «Schönegg» u hüt isch wieder «Schönegg» gebrüchlech. 

O bim Houze isch es gäbiger, we dr Waud nid stotzig isch. Vo däm här verwungerets nid, dass me o Wäuder fingt mit «Schön». E gäbige Näbeeffekt vom äbenere Waud isch sicher o scho vor Jahrhunderte gsy, dass dert d Böim greder wachse u vo däm här ds Houz wärtvouer isch. «Schönholz» z Rüederwiu isch es bekannts Byspiu – bekannter isch nume no e ehemalige Bewohner: Dr Niklous Löieberger, Füehrer im Burechrieg von 1656. 

«Schönhölzli» heisst e Bitz Waud zwüsche Bütschwiu u Gommerchinge – rundum isch es de aber rächt stotzig. Uffäuig schöni Bueche sy imene Teu vom Hürnbärgwäud gwachse. Dä Bitz, wo gäge Herufinge luegt, heisst no hüt «Schönbuechwaud». Die eutischti Queue, wo dä Ortsname erwähnt isch, stammt usem Jahr 1498. Im Urbar vom Chloschter Thorbärg isch ds «schoenibuoch» scho erwähnt. 

Im nächschte «Ört u Näme» geits i däm Stiu wyter – es git no es paar «schöni» Ortsnäme! 

18.10.2018 :: Bruno Zürcher
Meistgelesene Artikel
Der beste Weg, seinen Ruhestand zu geniessen, ist es, sich von der Vorstellung, man müsse...
I wott nech no chly wyter vom Gwärb verzeue, wo Signou ganz viufäutegi Produkt het...
Wieso heisst der morgige Freitag eigentlich Karfreitag? Viele denken vielleicht zuerst daran, dass...
Moto2-WM2019 mit Tom Lüthi: Beim dritten Lauf zur Motorrad-WM in Austin/Texas (USA) feierte Thomas Lüthi in der...
Schangnau: Im Gasthof Löwen wird dieser Tage bodenständige Kost serviert. Der Jodlerklub Hohgant...
Wochen-Zeitung
Brennerstrasse 7
3550 Langnau i. E.
Tel. 034 409 40 01
Fax 034 409 40 09
info@wochen-zeitung.ch
Redaktion: 034 409 40 05
Öffnungszeiten:
Montag - Freitag
07:30 - 12:00 Uhr
13:30 - 17:00 Uhr