Anmelden
I zwüne Jahr het sech d Reformation düregsetzt

Bärn het scho 1524 aui Landständ aagfragt, was sie vo dere Diskussion um die Reformation däiche. Die meischte Ämter hei gemäudet, dass si das nid chönne säge, me heig zweni Informatione. Nume grad ds Obersimmetau isch klar füre aut Gloube gsy u d Ämter Chonufinge, Thun u Aarou hei zwar wöue katholisch blibe – aber me sött scho i erschter Linie das mache, wo d Bibu tüeg befäle. Me muess hie no säge, dass d Regierig überhout nid het gseit, wie si säuber über die Sach däichi. 

Die Reformation isch aber es Thema blibe: Ganz zfride mit de Prieschter u de Chlöschter isch me nid gsy. Vo de Chlöschter sy o Mönche u Nonne usträtte u hei ghüratet, was chiucherächtlech natürlech nid wäri gange. E Baltasar Rutschi u e Marx Probscht hei de Lüt ufem Land verzeut, dass d Obirgkeit u d Chlöschter nid rächt heige, sondern dass dr Herrgott d Wäut für aui glych heig gmacht. Bärn het die zwee churzerhand de la verhafte. 

Aber grad d Chlöschter sy uf einisch nüm klar katholisch gsy. Me seit, dass im Chloschter Trueb dr Abt Thüring Ruscht us em Chloschter syg usträtte. Er isch de nach dr Reformation z Louperschwiu reformierte Pfarrer worde. Dr Niklous vo Wattewyl, e Suhn vom Schultheiss vo Bärn, isch Prieschter gsy u me het ne scho gseh aus Nachfouger vom Bischof vo Lausanne. Aber o är isch uf einisch für d Reformation gsy u aus Prieschter zrüggträtte. 

Bi dr nöie Umfrag von 1526 sy erscht zwöi Ämter, Schänkebärg im Aargou u Erlach, für d Reformation gsy. Dass uf ds Mau geng wie me, o d Mitglider vom chlyne Rat, für d Reformation sy gsy, isch es Problem für e Chasper vo Müline worde. Dr sträng katholisch Chasper hätti nämlich gar nüt im chlyne Rat verlore gha. Er isch zwar ufem Schloss Brandis gebore, aber das isch denn gar nid bärnisch gsy! Dr Chasper vo Müline isch auso e Ussländer gsy. 

Im Mei 1527 sy d Verträter vor Landschaft wieder zämecho. Im Ämmitau isch nume no grad d Stadt Huttwiu füre aut Gloube gsy, aber im Bärner Oberland hets ganz bös usgsee füre Reformator Zwingli u siner Bärner Kollege. Dr Prieschter vo Langnou het i dere Zyt aber vor Chanzu ache verzeut, dass es für die katholischi Mäss überhoupt niene e Ysetzig ir Bibu heig. Die syg auso für nüt. Drum het er ab sofort kener Mässe me gläse. Langnou, so chame auso säge, isch die erschti reformierti bär-näschi Gmeind gsy. 

 

 


22.06.2017 :: Hans Minder, Lokalhistoriker
Meistgelesene Artikel
Man vernimmt ja als Kolumnenschreiberling eher selten, ob die Aufsätze überhaupt gelesen...
«Gutes tun, Gutes tun, ist gar nicht schwer. Man kann so viel Gutes tun, zu Hause und im...
Bärn het scho 1524 aui Landständ aagfragt, was sie vo dere Diskussion um die Reformation...
Vor der Sommerpause der Motorraad-Weltmeisterschaft kassierte Thomas Lüthi beim Deutschland-GP...
Nennen wir sie Eva. «Schreib doch darüber», hat mich Eva aufgefordert. Ihr...
Wochen-Zeitung
Brennerstrasse 7
3550 Langnau i. E.
Tel. 034 409 40 01
Fax 034 409 40 09
info@wochen-zeitung.ch
Redaktion: 034 409 40 05
Öffnungszeiten:
Montag - Freitag
07:30 - 12:00 Uhr
13:30 - 17:00 Uhr