Anmelden
Ds heilige Öu isch diräkt vom Petrus cho

Dr Heilig Oswaud isch nid nume z Ängland, sondern o uf em Kontinänt bekannt u berüehmt worde. Är isch dr Schutzpatron vo de änglische Chünige, de Chrüzfahrer, de Lüt, wo Gwächs aapflanze u vo de Vehzüchter. Nützlech syg är gäge Pescht. 

I der Schwyz isch är no hüt der Schutzpatron vom Kanton u vor Stadt Zug. Dr Heilig wird dargsteut aus Chünig (Chrone, Zepter, Chrönigsmantu, mit ere Tube unere Sunne uf dr Bruscht u hüfig o no mit ere Chräie. Die Chräie isch sit öppe um 1300 es Zeiche vom Heilige Oswaud. I dr Läbesbeschrybig vom Heilige Oswaud heisst es nämlech, das bir Chrönig z Heilige Öu heig gfäut. De syg e Chräie cho z flüge mit emene Fläschli Öu, wo es Zedeli sy dran gsy, u das heig dr Heilig Petrus im Himu säuber gchrybe. Dr Heilig Petrus heig das Öu säube gsägnet! E wichtigi Reliquie vom Heilige Oswaud isch übrigens nid öppe z Ängland, nei, si Chopf isch ir Chiueche vo Hildesheim in Dütschland. 

Aus Familiename gits Oswaud i viune Orte ir Schwyz: I de Kantön Aargou, Bärn (Haslibärg u Oberhofe am Thunersee), Basustadt, Glarus, Graubünde, Luzärn, Thurgou u Züri. Im Thurgou isch er bsungers hüüfig, grad i euf Gmeinde isch dä Name unger de aute Familie-näme. Im Jahr 2016 hei drzu 841 Bewohner vor Schwiz «Oswald» aus Vorname gha. Logischerwys aus Manne! Aber: Es git dä Vorname o wyblech, nämlich «Oswalda» u da hets 2016 sogar sibe Froue gha ir Schwyz. Bi de Manne chöme no 324 drzue, wo die itauiänischi Fassig «Osvaldo» trage. 

Dr Gedänktag für e Heilig Oswaud isch dr 5. Ougschte. Ganz interessant isch, dass d Lüderechiubi hüt no am erschte Sunn-dig im Ougschte düregfüehrt wird. Auso meh oder weniger am Tag von Heilige Oswaud. So e Art Tanzvergnüge hets aber o ir Neechi vo St. Oswaud ir Gmein Trachsuwaud gä: Ganz uf der Gränze ir Richtig zum Tällehüttli isch e Matte, wo me «ds Tanzbödeli» seit. Dert heig sech aube im Summer d Jugend vom Dürrgrabe, em Ober- u Ungerfrittebach troffe. Gschlegelt syg dert o worde, bsungerbar wes öppe um d Brutschou syg gange u no Burschte us dr Goul oder usem Trueb syge cho!

07.12.2017 :: Hans Minder, Lokalhistoriker
Meistgelesene Artikel
Von Langnau nach Rüegsauschachen: Ein Metzgerwechsel im Jakob-Markt
Zollbrück: 22 Jahre führte Rudolf Lüthi von der «Hübeli-Metzg» in Langnau die...
Wohär chönnt äch dr Ortsname «Fälbe» cho? Villech vo...
Die Zahl der Menschen, die Informationen und Neuigkeiten dergestalt zurechtbiegen und...
Dr Heilig Oswaud isch nid grad e Heilige, wo me im erschte Momänt a ds Ämmitau...
Sollten Sie mich demnächst mit einem grossen Kinderwagen in einem Zug oder Bus antreffen, so...
Wochen-Zeitung
Brennerstrasse 7
3550 Langnau i. E.
Tel. 034 409 40 01
Fax 034 409 40 09
info@wochen-zeitung.ch
Redaktion: 034 409 40 05
Öffnungszeiten:
Montag - Freitag
07:30 - 12:00 Uhr
13:30 - 17:00 Uhr