Anmelden
Dert, wo d Handwärker gwohnt hei
Dert, wo d Handwärker gwohnt hei

I dr Gmein Trachsuwaud hei grad es paar Handwärk u Brüef ihri Spure i de Ortsnäme hingerlaa. Ir «Saagi» isch logischerwys Houz gsaget worde – u das isch geng no so. Ir «Gärbi» hingänge wärde kener Tierhüt meh gärbt. Nümme im Betrieb isch o ds «Chougrüebli», dert isch früecher köhleret worde, u o d «Stampfi» stungget nümme, dass mes wytumenang ghört. Gstampfet het me dert Chnoche. Bevor me se het düreglaa, het me jedes no so chlyne Bitzeli Fleisch müesse abmache u die Chnöche nächhär la trochne, bis si düür sy gsy. Nächhär het me se ir Stampfi zu Pulver gstampfet. Das het me aus Dünger chönne bruche oder o für Houzliim. E Gigebouer het mir säuber mau gseit, dass är no hüt settige Liim bruchi – dä syg super elastisch u löi sech o wieder la lööse, we me ne tüeg erwerme. 

Houz, we o chly weniger filigran verarbeitet aus dr Gygebouer, het o dr Chüeffer brucht, wo im Chüefferhus het gwohnt. Theo-
retisch wär o müglech, dass d Bezeichnig Chüefferhus vomene Familiename chiem, das isch aber weniger guet müglech. Bim Chüeffere däicht me i erschter Linie a Wyfesser. E Chüeffer im Heimisbach het aber vor auem Mäuchtere, Söibüttine oder öppe Bschüttfessli gmacht.  

Grad e ganze Ortsteu isch im Heimisbach nach em Hus vom Chrämer benamset worde. Die erschti Erwähnig fingt me im Urbar von 1539: «der hoff Kramers husz genant». O Chramershusbärg u Chramershusschache sy autbeleit. Dä Ortsteu isch scho im 16. Jahrhundert ds wirtschaftleche Zäntrum vo dr ganze Tauschaft gsy u wägem uffäuige Chramhus zu sire Bezeichnig cho. Ds Wort «chramer» isch übrigens scho im Mittuauter gebrüchlech gsy. E Händler, e Chrämer äbe, isch denn aus «krâmaere» bezeichnet worde. 

I däm Tau hets no wyteri Handwärch gha. Im Wagnerhus sy Wäge, Schnägge u vilech o Gutsche bout worde. D Achse u d Reife für d Raad sy villech ihr Schmitte im Thau gmacht worde. 

08.02.2018 :: Bruno Zürcher
Meistgelesene Artikel
Kolumne: Meine Freude war gross, als ich den Brief eines grossen Discounters erhielt, in dem ein Gutschein...
Singen im Songline-Musical und  Kindern etwas weitergeben
Rüegsau: Bei einer Probe des diesjährigen Songline-Musicals sangen 126 Kinder und Jugendliche vom Leben...
Ei grossi bärneschi Erfindig ir Chuchi geit nid uf die herrschaftlechi Chuchi vo de...
Junge Gärtnerin gibt in SRF-Sendung «Hinter den Hecken» Tipps
Lauperswil: Als Expertin in der Sendung «Hinter den Hecken» gibt Céline Gurtner Tipps zu...
Dä Ortsname kenne nume no weni Lüt
Bimene Haar wäri dä Ortsname, wos hüt drum geit, äue für geng verlore...
Wochen-Zeitung
Brennerstrasse 7
3550 Langnau i. E.
Tel. 034 409 40 01
Fax 034 409 40 09
info@wochen-zeitung.ch
Redaktion: 034 409 40 05
Öffnungszeiten:
Montag - Freitag
07:30 - 12:00 Uhr
13:30 - 17:00 Uhr